Geguritan Piwelinge Simbah

Piwelinge  Simbah Wadon

Dening : Aida Nurjanah

Rigma sampun boten cemeng malih

Ragane mung kari balung lan kulit

Wengi kang ngatentremke ati

Angin kang nerak wengi iki

Dadi saksi piwelinge simbah wengi iki marang putune

Ngger putuku,,

Nalikane jaman wis ora mihak awakmu besuk

Nalikane jembatan kabeneran wus ora bisa dilewati maneh

Nalikane manungsa maleh dadi kewan

Aja lalikke piwelinge simbah wengi iki

Tansah ngabdia marang wong tuwamu lan Gusti

Sanajan kabeh kahanan mau kadadean marang sliramu

Atimu ora bakal goyah karo ajak-ajakane setan alas

Setan alas sing nggeret kowe lan kabeh manungsa mlebu kolam geni

Kolam geni sing kekal

Read More

Geguritan Kang Trep

Kang Trep

Dening: Aida Nurjanah

Sanajan apik

Sanajan larang

Yen ora trep ora bakal nyawiji

Kadidene gembok

Sanajan apik dhewe

Sanajan larang dhewe

Yen dudu gathukane

Sakmatine dijajal ora bakal kabuka

Read More

Geguritan Bapak

Bapak

Anggitane dh. Abadhinar

(kapethik saka Panjebar Semangat No. 14 – 2 April 2011)

Kithah-kithih den surung becak

Lumebu ngomah apayon blarak

Simbok ngebak-i dandang njur banyu dimasak

Gawe wedang jahe nggo siram panas cecepak

Dhuwit receh sinebar meja tanpa taplak

Sinambi slonjoran kesayahan pinarak

Pikolehan sedina muput kringet disuntak

Mbelani butuh tan kena disengkak

Gawang anlawung saiba rekasaning Bapa anggiyak

Tumekaning wengi ngengonthel sinengguh penak

Tan ngresula sesambat senajan abot sanggane sajak

Sarwa gumujeng ampeyan kiyeng legawa tumindak

Udan nggreceh padinan mangsane rendheng pendhak

Kebes njedhidhil ageman ing lendhut gupak

Esem legawa ulihmu senajan cethetheran leh tindak

Ceceker ing dedalanan wiwit esuk nglabuhi anak

Bayaran sekolah lan pepantesing sandhang pinacak

Rikala klakon gumilir sinangga kang abot ing pundhak

Ngestokke dhawuh simbok tunggak jarak dadya mrajak

Mbecak-a Bapa sira kekiprah-a agawe cingak

Eman Rama tan menangi lamun lawas anggone tindak

Jengglingen sendheku ing pasareyan Bapak

Ngrerintih ngapa kondurmu ra kena diselak

Satemah asung kamulyan datan sama anglempak

Kasembadan saking puji pengestu andika mematak

Read More

Geguritan Arep Dadi Apa Negara Iki

Arep Dadi Apa Negara Iki

Anggitane Ginanjar Wasitaning Ati

(kapethik saka Panjebar Semangat No.14 – 2 April 2011)

Penak tuku,

Tinimbang terus ngenteni

Patang taun ngel-ngelan anggonmu ngudi

Patang taun bot-abote anggonmu ngungsi

Karep urip bisa luwih edi

Karep urip bisa luwih mulya tinimbang wingi-wingi

Penak tuku,

Tinimbang terus ngenteni

Nanging, arep dadi apa Negara iki?

Yen saben-saben kepinteran mung kanggo idhi

Kalah karo sing pawitane gedhi

Kalah karo sing dulurane wis padha dadi

Ndus, nganti kapan arep ngenteni

Wis gek ndang melua idhi

Jarene luwih penak tinimbang terus ngenteni

Kapinteranmu simpenen dhidik dina iki

Merga ilmu saiki wis tanpa pangaji

Merga pinter saiki dudu barang sing njanjeni

Penak tuku

Tinimbang terus ngenteni

Ora sah mikir dhisik

Mbuh arep dadi apa bakale Negara iki

Read More

Geguritan Kawula Alit

Kawula Alit

Angitane Wandya Supriyatno

(kapethik saka Panjebar Semangat No.6 – 5 Pebruari 2011)

Pari kang kuning merakake ati,...

Dumadakaan sengkleh,.............!!!

Katrejang wengise wereng,......kaya bakda campu nyadran!!!

Sewengi ludhes,.....!!

Aku ngelus dhadha,..sinambi ikhtifar,...njola mring Gusti!!!

Durung gantalan dina gumanti,...

Wedhus lan sapi,..........mati!!!

Langit kaya ambruk,.....petheng ndhedhet,........!!!

Entek kabeh bandha ing tanganku,...

Embuh kepriye nasib ing sakbanjure!!!

Esuk anak loro kabeh sambat,...

Njaluk dhuwit kanggo bayar SPP!!!

Atiku limbung,...

Linglung,...........

Gusti,......!!!

Kawula sambat.

Read More

Geguritan Noleh Memburi

Noleh Memburi

Anggitane Sumono Sandy Asmoro

(kapethik saka Panjebar Semangat No. 49- 3 Desember 2011)

Noleh memburi

Nyawang bulakan sawah lan pategalan

Mandeng ijone suket lan gegodhongan

Ngulati impen kang nate gogrog sadawane dalan

Ing galengan iki sikilku nate kesandhung

Nalika kumricike banyu kalen

Gawe wirama kasepen

Nyawang abure kuntul bablas mangidul

Noleh memburi nyawang birune langit kang nyimpen lintang-lintang gumebyar

Ana kang dak rasa gothang ing alam gumelar

Nalika kembang arum dalu gogrog ing latar

Sadurunge cangkriman wengi rampung kababar

Noleh memburi

Nintingi dina-dina sepi

Mbatang cangkriman mangsa

Kang kebak petung lan tandha-tandha

Read More

Geguritan Noleh Memburi

Noleh Memburi

Anggitane Sumono Sandy Asmoro

(kapethik saka Panjebar Semangat No. 49- 3 Desember 2011)

Noleh memburi

Nyawang bulakan sawah lan pategalan

Mandeng ijone suket lan gegodhongan

Ngulati impen kang nate gogrog sadawane dalan

Ing galengan iki sikilku nate kesandhung

Nalika kumricike banyu kalen

Gawe wirama kasepen

Nyawang abure kuntul bablas mangidul

Noleh memburi nyawang birune langit kang nyimpen lintang-lintang gumebyar

Ana kang dak rasa gothang ing alam gumelar

Nalika kembang arum dalu gogrog ing latar

Sadurunge cangkriman wengi rampung kababar

Noleh memburi

Nintingi dina-dina sepi

Mbatang cangkriman mangsa

Kang kebak petung lan tandha-tandha

Read More

Geguritan Tembung Lali

Tembung lali

Anggitane Pawit Mulyadi

(kapethik saka panjebar semangat no.53-31 Desember 2011)

Lali, pancen ora kelingan

Yen kelingan, mesthi bae ora lali

Sapa wonge kang takon ora bakal maido

Yen diwangsuli nganggo tembung iku

Paling amung dipaido amarga lali

Tembung siji iku pancen lagi peng-pengan

Ora amung wong cilik kang ngucapake,

Supaya ora disrengeni ndara utawa pangarsane

Punggawa uga lagi dhemen ngucapake,

Apameneh kang lagi kasangkut perkara gedhe

Tanpa isin ...

Tanpa wigih-wigih ...

Tanpa tedheng aling-aling ...

Entheng bae ngucapake tembung iku

Kamangka katon yen praupane dadi nyleneh,

Kaya ... ora tega ... ditulup

Nalika ngucap tembung iku

Lali aja diowahi dadi dielali utawa dilali-lali

Yen kebacut dhemen ngucap tembung iku

Mengko mundhak dadi lalenan temenan

Temenan dadi mitrane kang ora klambenan

Mlaku ngunclug turut pecinan ...

Read More

Geguritan Mampir Ngombe

Mampir Ngombe

Anggitane Winardi S. Nugrahanto

(kapethik saka Panjebar Semangat no. 22-1 Juni 2013)

Aku iki tresna nyang slirahku

Nanging ora tresna kang banget

Aku iki tresna nyang anakku

Nanging ora tresna kang keliwat banget

Aku iki tresna nyang kabeh kulawargaku

Nanging ora tresna kang banget

Aku tresna nyang tangga-teporaku

Nanging ora keliwat banget

Aku iki tresna nyang bumi wutah dharahku

Nanging ora tresna keliwat banget

Aku iki tresna nyang nusa bangsaku

Nadyan kudu banget ana watese

Aku tresna sak kabehane

Nanging sak madya lan sak lumrahe

Kabeh mau aku kudu bisa mapanake

Antarane kuwajiban lan katresnan

Awit aku mung mampir ngombe

Yen kelangan ing antarane

Muga ora ndadekake keduwung mburine

Yen katresnan ndonya tansah keliwat bangete

Tundhone mung ndedawa kuciwa

Banget tresna nyang kadonyan wedi mati

Tresna kang sejatine mung kunjuk ngersane Gusti

Kanthi lila-legawa tekading atai kang nyawiji

Read More

Geguritan Angen-angen

ANGEN-ANGEN

Anggitane Soestrisno

(kapethik saka Penjebar Semangat N0.14 surya kaping 7 April 2012)

Obahing raga...Ketarik getering rasa

Rasa sejati thukul saka telenging ati

Ati...apa kena takguroni?

Raga...apa bisa nggayuh suwarga?

Oh...kadangku sakarone

Ya Ati...ya Raga

Aja padha sulaya

Aku rep meling

Ati...tilingna sabdaning Gusti

Rina lan Wengi

Tindakna wedharing sabda

Kanthi tulusing Ati

Raga...bisa gawe menara

Nganti sundhul angkasa

Yen ta linambaran ati suci

Budi santoso

Sinartan sih rahmat

Berkahing gusti

Kang maha kuwasa

Read More

Geguritan Kanggo Mbakyuku

     Geguritan Kanggo Mbakyuku

(kapethik saka Panjebar Semangat No.22)

Ora cukup klawan tangisi, Yu

Nalika kembang wora-wari

Ora aweh salam

Ing pager lan pekarangan

Ombak segara

Wola-wali wus ngajari

Ngurip ngemu wektu

Lan pepesthi

Nalika kita wus tekan titiwanci

Kudu nengah  apa minggir

Dudu sumingkir

Waspadakna galo

Yen kesemir

Mengkilap ngajak ita

Kudu wani mangkat

Aja nganti kesengsem

Klawan nostalgia

Yen perlu kudu sangu senjata

Read More